14 February 2009
讀愛
夜深喇，我重溫緊德文。
雖然喺誠品買咗本德漢漢德字典，但網上字典已經成為更加方便快捷嘅學習工具。
有啲想讚自己有語言天份，不過其實我課堂學習嘅速度亦唔係好快－－
或者咁樣慢慢學、慢慢練習、慢慢活用，先係最好同最有效嘅學習方式啦！
如果我同你講琦溫絲莉，你可能知道佢呢期同里安納度狄卡比奧再度合作。
冇錯，不過嗰齣戲係啱啱上畫嘅《浮生路》，唔係我想講嘅《讀愛》。
《讀愛》係琦溫絲莉另外一齣電影，會喺下一個月先上映。
憑住呢套戲，佢唔單止喺金球獎攞咗最佳女配角，重嬴埋「英國奧斯卡」嘅最佳女主角添！
唻緊嘅奧斯卡金像獎，佢都會憑《讀愛》去角逐影后㗎。
好喇，唔講肥溫喇，其實我最初都冇諗住講佢……
講返《讀愛 The Reader》，佢嘅原著係德國小說《Der Vorleser》，
而呢樣嘢亦係令我豎起耳仔聽吓收音機究竟講緊乜嘅原因。
每次做完愛之後，女主角都會要男主角充當朗讀者，讀一篇文學作品畀佢聽。
聽落好似好得意又好似好浪漫咁，但其實－－女主角係一個文盲。
呢一部作品係用咗男主角對年紀較大嘅女主角嘅性愛，去隱喻德國人對納粹主義的感覺。
記得電台節目主持人大概係咁形容的：
「由最初唔明白嘅狂熱，到因知悉而疏遠，到最後選擇淡忘。」
呢三個階段，唔單止係男主角感情嘅寫照，亦係德國人喺歷史漩渦中嘅心情。
不過年輕又唔熟識西方歷史嘅我哋，大抵冇辦法好深切咁感受到箇中嘅感受吧！
我諗，有機會嘅話，不如買本《讀愛》嘅德文原著睇吧。
我相信咁樣會係聽歌以外，另一種幾好嘅自我進修方式呢。
係唔知去邊度買德文版嘅小說啫！
Der Vorleser, written by Bernhard Schlink
小說譯名：《朗讀者》、《我願意為你朗讀》
電影譯名：港《讀愛》、台《為愛朗讀》、中《生死朗讀》
