15 August 2009
最好給最好
咁啱個朋友今日喺會展返工，我喺北角雞蛋仔買完雞蛋仔之後，就即刻過去搵佢，憑住 pass 唔駛買飛就入咗美食博覽，好嘢！
本身冇諗住買嘢走㗎，係諗住試食，頂籠買吓小食㗎咋；買咗阿波羅，重有十蚊兩隻嘅燒帶子，好味嘅呢！不過最後都係畀個朋友卜中我會買嘢，而我就係衰咗喺香港美心月餅（係香港美心月餅，唔係美心月餅）手上面。
我都真係幾佩服美心㗎：當我拎住張 catalogue 揀梗味道嗰時，咁啱佢哋有人開咪，第一句係問啲員工聽唔聽到，而啲員工又好 responding 喎，已經畀到人好好印象。之後揸咪人就公佈佢哋已經拎到唔知咩八粒星，好勁勁，搞到我都覺得佢哋好勁。重點係臨收咪之前嗰句「我哋要將最好嘅帶畀顧客，好唔好？」然後啲員工一齊答「好！」真係秉承咗 Kelly 嗰句「最好給最好」，亦令到聽到嘅顧客好開心同對呢個品牌更有信心。
我諗美心真係有好好嘅 T&D，而賣月餅嘅員工亦十分醒，收咗咪之後就將切開哂、本身可能冇得試食嘅冰皮月餅當係「禮物」咁派畀附近嘅人食，好不熱鬧！而推銷美心冰皮嗰位姐姐亦唔止係感覺好 nice 咁簡單，佢重好識 do，即刻叫人留返兩份試食畀我哋，counter 姐姐好似重叫我哋「主動啲」快食過去拎唻食。我食嗰舊「滑滑奶黃」堅好味呀，好流沙包 feel，同美心西餅嘅奶黃雪山包有異曲同工之妙，唔怪得之 Kelly 最鍾意佢啦，我立刻將之鯨吞！Tawaii 咬咗一啖之後，唔知道佢嗰舊係咩嘢味，counter 姐姐諗咗一秒就講得出「抹茶甘栗」了！佢以為我都想知食梗咩味，就同我講我嗰舊係「滑滑奶黃」，叫我 LUR 出唻睇吓係唔係，哈，好好笑！
其實我最初諗住淨係買包限量版嘅「颶風提子」味㗎咋，但實在係抵受唔住口腹之欲同電視框嘅引誘，最終用一百蚊買咗五包唔同嘅味道，包括會場限定嘅「巨峰提子」、「香蕉船」、「心太軟」（脆脆），今年新出嘅「特濃朱古力石板街」，同埋好似好正嘅「抹茶芝士」（因為冇哂新出嘅「木瓜牛奶」了）。
呀，破費了。講咗咁多好說話，美心快啲畀啲着數益吓我啦。
1 March 2009
瑜珈這東西
今個學期報咗一個瑜珈course，不過只係上四堂兩個鐘，所以前幾日先上第一堂。
雖然我預咗好少男仔會報瑜珈堂，但真係估唔到廿幾個人只得三、四個係男仔。
我曾經喺OCamp入面做過啲可怕嘅動作，例如將對腳夾去頭後面，
嗰時話就話係瑜珈，其實只不過係我個人瘦、關節好、假縮骨啫。
今次，先至係我第一次正式接觸瑜珈呢！
由於係第一堂，我哋唔會成個flow咁做，只係練習呼吸同埋一啲基本嘅動作，
例如貓式cat pose同樹式tree pose，重有好多年前陳秀雯賣奶粉廣告嗰個pose。
當我做緊某動作，而Miss講出「戰士一式」呢個名嘅時候，我真係笑咗出唻！
戰士二式真係好辛苦，勁拉啲筋，搞到出哂汗，hold住個pose勁呼吸勁伸展！
不過我相信之後會有更多更高深嘅pose，我真係好期待下一堂！
如果第時有錢，我都想去啲fitness club玩下瑜珈呢。
